Fjölmargar framkvæmdir fram undan á Suðurlandi


30.04.2025

Framkvæmd

Á fundi með hagsmunaaðilum á Selfossi í dag kynntum við hjá Landsneti nýja kerfisáætlun og fyrirhugaðar framkvæmdir á Suðurlandi sem eru hluti af Kerfisáætlun 2025–2034. Þar kom fram að umfangsmikil uppbygging er fyrirhuguð á næstu árum sem miðar að því að styðja við aukna orkuöflun, styrkja flutningskerfið og bregðast við ört vaxandi þörfum iðnaðar á svæðinu.

Framkvæmdir þegar hafnar og fleiri á döfinni

Nýjar virkjanir verða tengdar við flutningskerfið  á svæðinu, þar á meðal fyrsti vindlundur landsins í Vaðöldu sem tengist í nýtt tengivirki á  Ferjufitjum. 

Á fundinum var líka farið yfir fjölbreytt verkefni sem þegar eru í framkvæmd eða undirbúningi m.a. Rimakotslína 2, Vestmannaeyjalínur 4 og 5, og tengingu viðskiptavina í Þorlákshöfn. Þá eru Þorlákshafnarlína 2 og Selfosslína 1 á framkvæmdaáætlun, ásamt endurnýjun við Írafoss og fleiri lykilþáttum kerfisins.

Undirbúningur spennuhækkunar

Eitt helsta markmið verkefnanna er að undirbúa spennuhækkun á svæðisbundna kerfinu, sem mun tvöfalda flutningsgetu þess. Með því skapast öflugri tengipunktar til að nýta þá raforku sem framleidd er á Suðurlandi og stuðla að öflugum og öruggum afhendingarmöguleikum.

Nánari upplýsingar á www.landsnet.is/kerfisaaetlun.

Takk öll sem komuð á fundinn með okkur í dag og lögðuð þannig grunninn að framtíðinni með okkur.

Aftur í allar fréttir