Landsnet hefur ráðið Rut Kristinsdóttur í starf sérfræðings í umhverfismálum á þróunar- og tæknisviði og mun hún vinna að umhverfismati framkvæmda og áætlana Landsnets.
Rut starfaði áður hjá Skipulagsstofun en hún var sviðsstjóri umhverfismatssviðs Skipulagsstofnunar á árunum 2008-2016. Þar kom hún að vinnu og bar ábyrgð á afgreiðslum stofnunarinnar á málum sem vörðuðu mat á umhverfisáhrifum og samskiptum við framkvæmdaraðila, ráðgjafa og almenning. Áður starfaði Rut sem sérfræðingur á umhverfissmatssviði Skipulagsstofnunar og var líffræðikennari við Menntaskólann við Hamrahlíð.
Rut er með B.sc í líffræði, kennsluréttindanám og M.Sc. í umhverfisfræði frá Háskóla Íslands.
„ Það er spennandi að takast á við þau verkefni sem framundan eru hjá Landsneti. Ljóst er að undanfarin misseri hafa mörg verkefni Landsnes reynst umdeild og meðal annars hafa deilur risið upp í tengslum við mat á umhverfisáhrifum. Það er eðlilegt að menn hafi skiptar skoðanir á áformum um framkvæmdir og umhverfisáhrif þeirra, en ég hef trú á að hægt sé að nýta umhverfismatið frekar til að skapa betri umræðugrundvöll um þessi mikilvægu mál, bæði uppbyggingu raforkukerfisins og umhverfismálin. Það ætti að geta leitt til frekari sáttar „ segir Rut.