Þann 12. nóvember fékk Landsnet niðurstöður úr útboði á raforku vegna viðbótartapa á fyrri hluta næsta árs. Orka vegna grunntapa fyrir sama tímabil var þegar tryggð í júní síðastliðnum.
Raforka tapast í flutningskerfinu og Landsnet ber ábyrgð á að kaupa þá orku sem þarf til að bæta fyrir þessi töp. Um 2% af allri fluttri orku tapast að jafnaði.
Hvað eru grunntöp og viðbótartöp?
- Grunntöp: Orka sem er keypt fyrir stöðuga notkun yfir lengri tíma og byggir á fyrirsjáanlegri þörf.
- Viðbótartöp: Sveigjanleg orkukaup sem eru notuð til að mæta skyndilegum sveiflum í orkunotkun.
Í nýafstöðnu útboði óskaði Landsnet eftir 17 MW og 29 GWst fyrir viðbótartöp á fyrri helmingi næsta árs.
Fimm aðilar tóku þátt, og bárust tilboð upp á samtals rúmar 83 GWst. Meðalverð samþykktra tilboða var 10.428 kr./MWst, sem er 29% hækkun frá því í fyrra, þar sem verðið fyrir fyrsta ársfjórðung hækkaði um 45%.
Staðan fyrir fyrri hluta árs 2025
Landsnet hefur nú tryggt samtals 175.964 MWst af raforku vegna flutningstapa, með heildarverðmæti upp á 1,689 milljarða króna.