Akureyri - Hólasandur

Annar áfangi nýrrar kynslóðar byggðalínunnar, Hólasandslína 3 var spennusett og tekin í rekstur í september 2022.

Markmið framkvæmdarinnar er bætt orkunýting, aukin flutningsgeta og að tryggja stöðugleika raforkukerfisins á Norður- og Austurlandi. Framkvæmdin er einnig mikilvæg fyrir flutningskerfi landsins í heild þar sem um er að ræða mikilvægan hlekk í styrkingu tengsla milli sterkari hluta kerfisins á suðvesturhorninu og veikari hluta þess á Austurlandi. 

Hólasandslína 3 er 220 kV raflína, 72 km löng, loftlína og jarðstrengur sem liggja innan fjögurra sveitarfélaga: Akureyrarkaupstaðar, Eyjafjarðarsveitar, Þingeyjarsveitar og Skútustaðahrepps. 

Fyrstu 10 km Hólasandslínu 3 frá Rangárvöllum á Akureyri voru lagðir sem jarðstrengur, tvö strengsett og var m.a. strengjabrú reist yfir Glerá vegna þeirra og nýtist hún jafnframt sem reiðbrú. Strengirnir liggja þvert yfir Eyjafjörð upp í hlíð Kaupangsfjalls í austanverðum firðinum þar sem við tekur 62 km löng loftlína.  Línuleiðin fylgir núverandi byggðalínu að mestu, en frá Laxárdalsheiði að Hólasandi er línan í nýrri línugötu. Yfir Laxárdal var línan strengd í um 1 km löngu hafi til þess að lágmarka umhverfisáhrif innan verndarsvæðis dalsins. Í loftlínuhluta Hólasandslínu 3 eru 185 stálröramöstur. 

Auk línunnar voru byggð ný 220 kV yfirbyggð tengivirki á Hólasandi og á Rangárvöllum við Akureyri gaseinangruðum rafbúnaði (GIS) og af nýrri kynslóð stafrænna tengivirkja.